ශ්රී ලංකාව සංවර්ධිත රාජ්යයක් බවට පත්වීමේ ගමනේදී ආර්ථික සංවර්ධනය, යටිතල පහසුකම් සහ තාක්ෂණික දියුණුව පමණක් ප්රමාණවත් නොවේ. එම ගමනේ සැබෑ ශක්තිය වන්නේ මානසිකව ශක්තිමත්, අභියෝගවලට මුහුණ දිය හැකි සහ චිත්තවේගීය වශයෙන් සෞඛ්ය සම්පන්න පුරවැසියන්ගෙන් සමන්විත සමාජයකි.
අද වන විට ශ්රී ලංකාවේ මනෝවිද්යා ක්ෂේත්රය තුළ විශාල අවධානයක් යොමු වී ඇති කරුණක් වන්නේ, රටේ සංවර්ධනය සඳහා මානසික සෞඛ්යයට හිමි විය යුතු ප්රමුඛත්වය පිළිබඳවයි. පුද්ගලයෙකුගේ හෝ ජාතියක සාර්ථකත්වය තීරණය කරන ප්රධාන සාධක දෙකක් ලෙස කාලය සහ ශක්තිය හඳුනාගත හැකි අතර, එම ශක්තියෙන් වඩාත්ම තීරණාත්මක වන්නේ මානසික ශක්තියයි.
කොළඹට සීමා වූ මනෝවිද්යාවෙන් ගම්මාන කරා
දශක දෙකකට ආසන්න කාලයක් පුරා සිදුකළ ක්ෂේත්ර අධ්යයන සහ නිරීක්ෂණවලින් හෙළි වී ඇත්තේ, මනෝවිද්යා උපදේශන සේවා බොහෝ දුරට කොළඹ සහ තදාසන්න ප්රදේශවලට පමණක් සීමා වී ඇති බවයි.
එහෙත් අනුරාධපුරය, මහියංගනය, මොණරාගල, බදුල්ල සහ වෙනත් දුරස්ථ ප්රදේශවල ජනතාවට වෘත්තීය මට්ටමේ උපදේශන සේවා ලබාගැනීමේ අවස්ථා තවමත් ඉතා සීමිතය.
මේ හේතුවෙන් ගොවීන්, පාසල් සිසුන්, විශ්වවිද්යාල සිසුන්, තරුණ ප්රජාව සහ පවුල් රැසක් මානසික පීඩා, ආතතිය, සබඳතා ගැටලු සහ ජීවිත අර්බුදවලට මුහුණ දෙන අවස්ථාවලදී නිසි මගපෙන්වීමක් නොමැති තත්ත්වයකට පත්ව සිටිති.
ව්යසන සහ අර්බුද මැද හැදී වැඩුණු පරම්පරාවක්
2004 සුනාමි ව්යසනය, 2019 පාස්කු ප්රහාරය, කොවිඩ්-19 වසංගතය, ආර්ථික අර්බුදය සහ මෑත කාලීන ස්වභාවික ව්යසන රැසක් ශ්රී ලාංකික ජනතාවගේ මානසික සෞඛ්යයට දැඩි බලපෑම් එල්ල කර ඇත.
විශේෂයෙන්ම ළමා හා තරුණ පරම්පරාව මෙම අභියෝගාත්මක පරිසරයන් තුළ හැදී වැඩී ඇති අතර, එහි දිගුකාලීන බලපෑම් ඉදිරි වසරවලදී වඩාත් පැහැදිලි විය හැකි බව මනෝවිද්යා ක්ෂේත්රයේ විශේෂඥයෝ පෙන්වා දෙති.
අද රැකියා වෙළඳපොළට සහ උසස් අධ්යාපනයට පිවිසෙමින් සිටින තරුණ පරම්පරාව මෙම අර්බුද රැස අත්විඳි පරම්පරාවක් වීම විශේෂයෙන් සැලකිල්ලට ගත යුතු කරුණකි.
ජාතික මට්ටමේ උපදේශක බලකායක අවශ්යතාව
මෙම පසුබිම තුළ ශ්රී ලංකාව පුරා සේවය කළ හැකි වෘත්තීය මට්ටමේ මනෝවිද්යා උපදේශක ජාලයක් ගොඩනැගීමේ අවශ්යතාව දැඩි ලෙස මතුවී ඇත.
එම අවශ්යතාව සපුරාලීමේ අරමුණින් සමස්ත ලංකා මනෝවිද්යා උපදේශකවරුන්ගේ සංගමය සහ Needs Campus ආයතනය එක්ව දැනුම ව්යාප්ත කිරීම, පුහුණු වැඩසටහන් ක්රියාත්මක කිරීම සහ නව උපදේශකවරුන් බිහිකිරීමේ වැඩපිළිවෙළක් ක්රියාත්මක කරමින් සිටී.
විශේෂයෙන්ම ළමා මනෝවිද්යාව, උපදේශන මනෝවිද්යාව සහ ප්රජා මානසික සෞඛ්ය ක්ෂේත්රයන් කෙරෙහි වැඩි අවධානයක් යොමු කරමින් රට පුරා සේවය කළ හැකි වෘත්තීය බලකායක් නිර්මාණය කිරීම මෙහි අරමුණයි.
2030 සහ 2050 දෙස බලන විට
ලෝකය මුහුණ දෙන යුදමය තත්ත්වයන්, ආර්ථික අස්ථාවරතාවයන්, කාලගුණික විපර්යාස සහ සමාජ වෙනස්කම් හේතුවෙන් ඉදිරි දශක කිහිපය තුළ මානසික සෞඛ්ය සේවාවන් සඳහා ඇති ඉල්ලුම තවදුරටත් ඉහළ යනු ඇතැයි අපේක්ෂා කෙරේ.
එහෙත් එම අවශ්යතාවයට සරිලන පරිදි පුහුණු වූ සහ සදාචාරාත්මක ප්රමිතීන්ට අනුකූලව කටයුතු කරන උපදේශක බලකායක් රට තුළ ප්රමාණවත් ලෙස නොමැති බව පෙනී යයි.
මේ නිසා රජය, අධ්යාපන ආයතන, සෞඛ්ය අංශය සහ පෞද්ගලික අංශය එක්ව මේ සම්බන්ධයෙන් දිගුකාලීන සැලසුම් සකස් කිරීම කාලීන අවශ්යතාවයකි.
ගැටලුව මතුවීමට පෙර විසඳුම සකස් කිරීම
අපගේ සමාජයේ සාමාන්ය ප්රවණතාව වන්නේ ගැටලුවක් ඇති වූ පසුව ඒ සඳහා විසඳුම් සෙවීමයි. නමුත් දියුණු රටවල් ක්රියා කරන්නේ අනාගත ගැටලු කල්තියා හඳුනාගෙන ඒවාට අවශ්ය සම්පත් සහ වෘත්තීය බලකාය ගොඩනැගීමෙනි.
මානසික සෞඛ්ය ක්ෂේත්රය සම්බන්ධයෙන් ද ශ්රී ලංකාවට අවශ්ය වන්නේ එවැනිම පූර්ව සැලසුම් සහගත ප්රවේශයකි.
ජාතික සංවාදයක් ආරම්භ කළ යුතු කාලය දැන්
මානසික සෞඛ්යය යනු පුද්ගලයෙකුගේ පෞද්ගලික ගැටලුවක් පමණක් නොවේ. එය රටක ආර්ථිකය, අධ්යාපනය, පවුල් පද්ධතිය, නිෂ්පාදනශීලිත්වය සහ සමාජ ස්ථාවරත්වය සමඟ සෘජුවම සම්බන්ධ වූ ජාතික ප්රශ්නයකි.
එබැවින් මානසිකව ශක්තිමත් පුරවැසියන්ගෙන් සමන්විත ශ්රී ලංකාවක් ගොඩනැගීම සඳහා රජය, විද්වතුන්, සෞඛ්ය වෘත්තිකයන්, අධ්යාපනඥයන්, රාජ්ය නොවන සංවිධාන සහ සිවිල් සමාජය එක්ව පුළුල් ජාතික සංවාදයක් ආරම්භ කළ යුතු කාලය දැන් එළඹ තිබේ.
ශ්රී ලංකාවේ අනාගතය ආරක්ෂා කිරීම සඳහා මානසික සෞඛ්යය ජාතික ප්රමුඛතාවයක් බවට පත්කිරීම තවදුරටත් ප්රමාද කළ නොහැකි අවශ්යතාවයකි.
ඔබේ අදහස් 070-7076956 අංකයට වට්ස් ඇප් පණිවුඩයක් මගින් යොමුකරන
Leave a Reply